CV Ludderzaat sjtelt zich veur

Leef luu van Rothem en umsjtreke: 2 jaor geleije hubbe dees 6 dwaze op de foto (van links nao rechs: Bink van de Keuning, Hoeber van den Hoedemeker, Moelemeeker Thei van de Breuer, Geirar van Bosma, Luuske van Zambon en Fredmond van de Mullender ut idee opgepak um hun eige prins oet te rope. Met 6 man (Jeh weh wil zich hie noe bie aansjlete?) hubbe ze zich toen zelliversj unne onvergetelikke vastelaovunt bezurg.

Veurig jaor hubbe ze dao unne 7de biegekrege Marcelke van de Booren, deh toen ouch nog zwao mer Oet ut Niks prins woort. Met alle sjtomme kal van Marcel, meh ouch van Thei en de inbring van oa CV Hopeloos waort ut unne supersjieke daag! Euverigus ontbrik Marcelke op dizze foto, umtot heer neet allein sjteeds van alles kwiet waor (scepter end), meh oeteindelik ouch zichzellif oet ut oug verloore waor! Ouch dit joar rope veer natuurlik unne prins oet en ich kin uch belaove dat weurt mich weer unne sjieke!

Dit jaor goon veer helaas neet met dun optoch met. Veer zeen nameluk sjus wie topsjporters en nao de veurbereiding hubbe veer besjlote dat dit neet in oos pregramma pas. Wat goon veer dan waal doon? Veer kome sjmeurigus bieein op Dun Olieberrig bie os zeer gerespecteerde lid Bink van de Keuning. Dao laote veer nao un krachtig ontbijt Ut ludderke op! Vervolligus trekke veer met vrouwluu en nog mjer dinger richting Meersje wao veer bie dun euverweeg veur de blommezaak van Hollendersj de tent goon opzette. Onger ut genot van get beer, schjrobbeleir en meziek, laote veer dao ozze Marcel aaftreije en zwao rond de klok van kwart veur 2 rope veer dan ozze nuuje prins oet! De res van de middig zalle veer de deilnummersj van dun optoch un klein bettike begeleide.

Veer kriege de vraog waorum in Meersje? Einzerzijds umtot veer dao get mekkelikker bereikbaar zeen. Gezeen de te verwachte grwâtte toeloup nao us feestent, vonge veer ut handig dat treine en busse in de buurt sjtoppe. Eederein is dus welkom in de feestent en geer krieg uiteraard noe al de groete oet die feestent. Angerzijds heit ut ouch met os thema te make dat veer oetgeweke zeen, meh dat zeet geer maondig waal!

Wilste de bie zeen dan kin dat, meh bis op tied want veer hubbe nog mér un paar plaatse euver. Wat kint geer verwachte: hjellemaol niks, want veer doon dit op os eige maneer. Geine officiële sjtatus, niks. Gewoon un hauf eurke plezeer.

Ut pregram:
Um 11 op 12 laote veer Ut Ludderke op dun Olieberrig
Um ein oor dan sjteit de tent bie Hollendersj
Um keteer veur 2 is ut tied um aafsjied te numme van prins Marcel de hjersjte
Um 2 oor is ut dan tied um ozze nuuje prins te onthulle. Wéh weurt degene deh de nuuje prins weurt van dit zooitje ongereigeld
Vanaaf un oor of kwart veur 3 ontvange veer dun optoch
Denao goon veer in Meersje nog get drinke en geneete van ozze eige bbq!

Wilt geer un hauf eurke kome kieke (langer geit dat neet doore, angersj kriege veer teveul doorsj), en geer weilt get drinke, dan zalt geer dat zellif meit motte neume, want verkoup moag neet boete op sjtraot. Wilt geer ozze nuuje prins felicitere, dat kin dat vanaaf kwart euver 2! Kedootip veur de prins: beer, veul beer.

Zwao es geer zeet mot alles sjuuve veur de carneval en dur is waercode rwâd, gael en greun aafgekondigd. Es geer dao gein hoondervel van krieg dan brik mich de kloomp. Waal dur met zien alle veur zeurige dat vanaaf 6 maart alles weer Spik en Span is!

Fijne vasteloavunt veur eederein!
Tot maondig 04 maart bie ozze nuuje prins!
Alaaf Ludderzaat, Alaaf Rothem en Alaaf prins.

Nog get in dit verheulke zitte un aantal artieste en leedsjes verborrige: es geer ze aollemaol herkint kint geer ze inlevere in de tent tot 16.00 oor. De pries deh geer kint winne: unne daag/aovunt/nach sjtage loupe met ein van os lede!

Lees vorig bericht

Rood geel groen kleurt de gemeente

Lees volgend bericht

Internationale Vrouwendag in Geulle